Women’s Asia Cup 2022 Schedule, टी-२० वर्ल्डकपच्या आधी होणार भारत विरुद्ध पाकिस्तान मॅच; वाचा कधी, कुठे आणि केव्हा – womens asia cup 2022 india vs pakistan match will be on 7th octoer

0
6


क्वालालंपूर: सध्या क्रिकेटप्रेमींच्या नजरा पुढील महिन्यात होणार्‍या टी २० विश्वचषकावर खिळल्या आहेत. यंदाच्या विश्वचषकात भारताची विजयासाठीची रणनिती काय असेल, पूर्वीच्या सामन्यात भारताच्या चुका सुधारून भारत कसा सामना जिंकेल, याविषयी चर्चा सुरू आहेत. यापूर्वी आशिया कपमधील सुपर फोर सामन्यात कट्टर प्रतिस्पर्धी पाकिस्तानकडून झालेल्या पराभवाचा बदला भारत विश्वचषकात घेणार का हे देखील पाहणं उत्सुकतेचे आहे. पण या विश्वचषकापूर्वी आपल्याला भारत विरुद्ध पाकिस्तान लढत पाहायला मिळणार आहे.

ऑक्टोबर महिन्यात बांगलादेशमधील सिल्हेत येथे सुरू होणाऱ्या महिला टी-२० आशिया चषक स्पर्धा सुरू होणार आहे. या स्पर्धेत भारतीय महिला संघ ७ ऑक्टोबरला कट्टर प्रतिस्पर्धी पाकिस्तानशी (Pakistan) भिडणार आहे. आशियाई क्रिकेट परिषदेचे (ACC) अध्यक्ष जय शाह यांनी मंगळवारी ही घोषणा केली. १ ऑक्टोबरपासून सुरू होणाऱ्या या १५ दिवसांच्या स्पर्धेत सात संघ सहभागी होणार आहेत. ही स्पर्धा राऊंड रॉबिन पद्धतीने खेळवली जाईल आणि अव्वल चार संघ उपांत्य फेरीसाठी पात्र ठरतील.

भारत, पाकिस्तान, यजमान बांगलादेश, श्रीलंका, संयुक्त अरब अमिराती (UAE), थायलंड आणि मलेशिया हे सहभागी संघ आहेत. तालिबान सत्तेत आल्यापासून अफगाणिस्तानमध्ये महिला संघ नाही. भारत आपल्या मोहिमेची सुरुवात श्रीलंकेविरुद्ध करणार आहे.

भारतीय संघाचे आशिया कप वेळापत्रक

भारतीय संघ १ ऑक्टोबरला श्रीलंकेविरुद्ध आपल्या मोहिमेला सुरुवात करणार आहे. त्यानंतर सलग दोन दिवस संघ मलेशिया (३ ऑक्टोबर) आणि यूएई (४ ऑक्टोबर) यांचा सामना करेल. टीम इंडिया ८ ऑक्टोबरला यजमान बांगलादेश आणि १० ऑक्टोबरला थायलंडशी भिडणार आहे. हरमनप्रीतच्या नेतृत्त्वाखाली टीम इंडिया १० दिवसांत सहा लीग मॅच खेळणार आहे. या स्पर्धेतील उपांत्य फेरीचे सामने ११ आणि १३ ऑक्टोबर रोजी होणार आहेत. तर या स्पर्धेचा अंतिम सामना १५ ऑक्टोबरला होणार आहे.

श्रीलंका-पुरुष आशिया कपचा चॅम्पियन

महिला संघाच्या आशिया चषकापूर्वी पुरुषांचा आशिया कप यूएईमध्ये आयोजित करण्यात आला होता, ज्यामध्ये श्रीलंकेच्या संघाने पाकिस्तानचा पराभव करून विजेतेपद पटकावले होते. या स्पर्धेचे यजमानपद श्रीलंकेकडे असले तरी देशातील राजकीय गोंधळामुळे ही श्रीलंकेच्या यजमनपदाखाली यूएईमध्ये घेण्यात आली.
श्रीलंकेच्या पुरुष संघाने आठ वर्षांनंतर आशिया चषकाचे विजेतेपद पटकावले. त्यामुळे महिला संघ त्याच कामगिरीची पुनरावृत्ती करेल अशी अपेक्षा असेल, मात्र या स्पर्धेत भारतीय महिला संघ विजेतेपदाचा प्रबळ दावेदार मानला जात आहे.

LEAVE A REPLY

Please enter your comment!
Please enter your name here